Admen

ИЗБЕГНУВАЈТЕ ДОЛГИ СОСТАНОЦИ: Седум ефикасни препораки од Илон Маск до вработените

23 дек 2018

Долгите состаноци го трошат времето, е еден од седумте совети упатени од основачот на компаниите „Тесла“ и „Спејс Икс“ и еден од најголемите технолошки иноватори на денешницата, Илон Маск.

Овие совети тој им ги упатува на своите вработени, а со цел да бидат поефикасни во тоа што го прават.

Советите на Маск се практични и се насочени кон заштита на личната психофизичка енергија од непотребни активности и постапки.

1. Долгите состаноци го трошат времето

Прекумерните состаноци се лошо влијание од големите компании. Ослободете се од сите големи состанувања, освен ако не сте сигурни дека ќе бидат од корист на сите присутни. И, секогаш нека бидат многу кратки.

2. Нема потреба од редовни состаноци, освен во ургентни ситуации

Ослободете се и од сите редовни состанчења, освен ако не се соочувате со нешто исклучително ургентно. Редовните состаноци треба да бидат прекинати, штом заврши ургентната ситуација.

3. Ако нема потреба да бидете на состанок, заминете

Заминете од состанок штом стане очигледно дека вашето присуство не е од дополнителна корист. Не е непристојно да заминете, непристојно е да се седи непотребно и да се троши нечие време.

4. Избегнувајте конфузна терминологија

Немојте да користите акроними или нејасни зборови и непозната терминологија за процесите на работата. Во основа, сè што треба дополнително да се објаснува, ја отежнува комуникацијата. Не сакаме да ги примораме луѓето да губат време на помнење терминологија.

5. Не дозволувајте хиерархијата да ја наруши ефикасноста

Комуникацијата теба да се движи по најкусата неопходна патека за работата да биде завршена, а не низ синџир од наредбодавачи (chain of command). Секој менаџер што се обидува да воспостави комуникација преку синџир на управување, многу скоро ќе се најде во ситуација на расплинување во секој дел од работата.

6. Ако треба да стапите во контакт со некого, одете директно

Слабата комуникација меѓу различни оддели е главен извор за проблемите. Тоа се решава со слободно споделување на информациите на сите нивоа.

Доколку се оди по редослед на вработен, менаџер, директор, одговорен, друг одговорен, трет, четврт, тогаш на крај ќе излезат многу нејаснотии и недоречености. Сосема е во ред кога се пристапува директно, за работите да бидат извршени како што е потребно.

7. Не си го трошете времето во следење неразумни правила

Во основа, секогаш како личен водич имајте го здравиот разум. Доколку следењето на некое компаниско правило е очигледно неразумно во одредени ситуации, тогаш јасно е дека тоа правило треба да се смени.

(AdToDate.mk/Извор:Businessinsider)




Слична содржина

Оставете коментар

CAPTCHA code
Слична содржина
Напишавме