Admen

ДАРКО БУЛДИОСКИ, NEW MEDIA: Измените на Фејсбук се поголем удар за медиумите, отколку за брендовите

01 фев 2018

Брендовите подобро ќе се снајдат во измените што ги направи „Фејсбук“, отколку медиумите, смета Дарко Булдиоски, специјалист за дигитален маркетинг од агенцијата „New Media“ и предавач на Интернет маркетинг академијата „Ec Council“.

Со Булдиоски, којшто е програмски директор и на Конференцијата за дигитални медиуми AllWeb, разговаравме за новитетите што ги воведе најголемата социјална мрежа, а со коишто во т.н. „њузфид“ (newsfeed) повеќе видлив простор им се дава на физичките корисници, за сметка на објавите (постовите) што доаѓаат од брендови, компании, медиуми.

Една од главните причини за драстичниот потег на „Фејсбук“, како што истакнува Булдиоски, е масовната појава на лажните вести и на заведувачките наслови што ги наведуваа корисниците да кликаат, без да наидат на нешто квалитетно.

Како резултат од таквиот потег, очекувањата се дека на социјалната мрежа ќе бидат застапени поквалитетни објави од страна на брендовите, но во исто време и поскапи.

Тој нагласува дека во алгоритмите на „Фејсбук“ повеќе ќе се вреднува т.н. значајна содржина (meaningful conversation) што ќе поттикне коментари и дискусии од корисниците. Таканаречените „лајкови“ и „шерови“ веќе нема да се толку релевантни за една објава да биде видлива во полето („њузфидот“) на индивидуалните корисници.

Според Булдиоски, брендовите бргу ќе се адаптираат, додека медиумите ќе поминат низ процес на турбуленции, зашто тие се многу позависни од „Фејсбук“.

Воедно нашиот соговорник им препорачува, како на брендовите, така и на медиумите, повеќе да ги користат и другите социјални платформи, особено „Инстаграм“, зашто, како што вели, тој е „златна кокошка“ за маркетинг објави.

Со Булдиоски разговаравме после предавањето за претставници од маркетинг-агенциите „Facebook: Што по замирањето на органскиот досег?“, што тој го одржа на Интернет маркетинг академијата „Ec Council“.

ВИДЕОТО ОД РАЗГОВОРОТ СО ДАРКО БУЛДИОСКИ Е НА КРАЈОТ ОД ТЕКСТОТ

* * *

ATD: Во последните две недели „Фејсбук“ направи големи измени. Во тие измени некој доби, некој изгуби. Кој доби, кој изгуби?

- Зависи како гледаме на работите. Во теорија никој не би требало да изгуби. Треба да добиеме еден подобар „Фејсбук“ во којшто ние како индивидуални корисници, со оглед дека сме му најважни на ФБ, ќе видиме многу поголема суштина во тоа и ќе поминуваме многу поквалитетно време таму. На сметка на тоа, ќе имаме и поголема лојалност кон тоа што ни се сервира на таа мрежа.

Тоа што ќе се случува, ќе биде пад на тој фамозен органски досег (organic reach), којшто „Фејсбук“ ни го нудеше за беспари веќе некое време.

ATD: Сепак, најмногу врева и стравувања се појавија кај брендовите и кај медиумите, коишто го користат „Фејсбук“ за промовирање на своите содржини. Дали се тие губитниците?

- Брендовите, особено глобалните, веќе некое време не сметаат на тој органски досег којшто е бесплатен. Тие имаат толку страници така што не можат да си дозволат нивната порака, којашто е внимателно креирана, луѓето да не ја видат. Тие пред неколку месеци, и година, почнаа да ги спонзорираат своите огласи. Огласувањето ќе се наплаќа, и никој веќе не плаче за тој органски досег.

Сепак, кај нас можеби тоа повеќе се одразува. Се надевавме дека тоа секогаш ќе ни биде достапно, но стручната јавност не е загрижена многу околу таа тема.

Но, медиумите се во друга ситуација. Тие беа многу зависни од „Фејсбук“. Толку имаат вложено, што не можат да се откажат од таа приказна. Се чувствуваат за нијанса предадени од „Фејсбук“. Но, сè е тоа една лукава игра меѓу тие два табора, меѓу „Фејсбук“ и медиумите.

Така повеќе турбуленции очекувам кај медиумите, отколку кај брендовите.

ATD: Спомнавте дека огласувањето ќе поскапи. Врз основа на што ќе следи тоа?

- Официјално „Фејсбук“вели дека ќе нема промени во алгоритмот за огласување. Но, самиот факт што прави модификација на „тајмлајнот“, односно „њузфидот“ кадешто ние ги добиваме информациите како корисници, како и фактот дека ќе добиваме помалку содржи по бројност, го прави моментот дека борбата за да се појавите на „њузфидот“ кај корисниците ќе биде поголема.

Така, за една иста позиција, при што ако претходно биле десет, а сега се осум позиции, ќе се борат идентичен број луѓе. Самиот систем во основа е наддавање во огласувањето. Кога има помалку места за огласување, тогаш цената оди нагоре. Очекувањето е дека цените ќе одат нагоре.

Во Македонија сме во различна позиција. Тука цените се мали и смешно е тоа да се дискутира. За разлика од кај нас, кај другите, кај развиените пазари, цените се многу повиски и стапките на покачување се очекува да бидат повисоки.

ATD: Но, на домашниот пазар, ако претходно огласувачите, на пример, давале по 20-30 долари за себе-рекламирање, дали сега ќе бидат подготвени да дадат 200 или 300 долари?

- Не очекувам да бидат подготвени да дадат. Но, дали ќе потрошите 10 или 100 долари не игра никаква улога, ако не остварите ниту една бизнис цел во позадина. Треба да се размислува на ефективно трошење на парите. Не да бидат тоа „лајкови“ или досег (reach), туку друга цел, како продажба, на пример.

Нема да се променат буџетите туку ќе се промени начинот на којшто ние ќе гледаме колку сме постигнале со тие пари. Така се надевам дека за 10 долари, кои сега ладно ги даваме за да имаме некаков досег, во иднина да кажеме дека сме достигнале една или две продажби.

ATD: „Фејсбук“ нагласи дека сега објавите треба да бида со т.н. значајна содржина (meaningful conversation). Што значи тоа, што треба да се „постира“?

- Сега фокусот ќе биде на т.н. „meaningful conversations“. Тоа, како технички индикатор, се коментарите. Ќе се вреднуваат долги коментари коишто се во форма на дискусија, а не еднолични и кратки.

Следствено, можеме да очекуваме подобри теми, намалување на лесните теми и наградни игри од типот „Погоди го точниот одговор“. Едноставните техники коишто изнудуваат нереална дискусија ќе се намалуваат, а тоа ќе води кон позначајни дискусии како дебати и размена на искуства.

ATD: Значи ли тоа дека се потребни помалку објави во текот на денот, но исполнети со дебати и реплики?

- Тоа е насоката кон којашто одиме при советувањето на брендовите. Одиме кон поквалитетна содржина, наместо почеста содржина. Притоа, ако е потребно, ќе се вложат и повеќе пари за промовирање, за нешто што ќе трае подолго.

ATD: Дел од коментарите се дека повторно доаѓа времето на Фејсбук-групите. Каква ќе биде нивната улога?

- „Фејсбук“ вели дека групите се битна работа, зашто во нив се случуваат дискусии. Тие се направени за да стимулираат дебата, некаква дискусија. Но, не вели дека ќе можат да се користат за т.н. реферал дата, односно да генерираат посети на вашиот сајт или да   продавате нешто таму.

Но, тоа е како „Фејсбук“ ги гледа сега работите. Треба допрва да се види како корисниците сето тоа ќе го модифицираат и ќе се адаптираат кон промените.

ATD: Кој е вашиот директен совет до брендовите и медиумите, како да се снајдат во новата ситуација?

- За брендовите е за нијанса полесно зашто тоа е нешто што со години го зборуваме. Зборуваме за правење стратегија во којашто нема сè да се случува на тој единствен канал, да не биде сè на „Фејсбук“. Правиме стратегија брендот да биде медиум, платформа којашто ќе овозможи конверзација меѓу корисниците.

Продажбата, сама по себе, не е единствената комуникација што треба да се одвива меѓу брендовите и корисниците.

Мотивацијата за тие промени се лажните вести, особено т.н. клик-бајт лажни и заведувачки наслови. Ова е дел од борбата против нив. И „Фејсбук“ и „Гугл“ се под голем притисок од јавноста и од институциите да преземат нешто против таквите содржини

Кај медиумите, пак, имаме поразлична ситуација. „Фејсбук“ објави и нови системи за филтрирање на медиумите, за градење доверба кон нив. Потоа од „Фејсбук“ се повлекоа и префрлија одговорност кај корисниците да кажат кој медиум е релевантен.

ATD: Што со другите платформи, како што е „Инстаграм“ на прмер. Колку тие можат да се користат?

- „Инстаграм“ во моментот е златната кокошка. Барем така изгледа според бројките. Дава одлични резултати кај одредена целна група. Нормално, не може кај сите. Тој е тоа што беше „Фејсбук“ пред многу години. Но, да не се заборави дека сопственик на „Инстаграм“ е „Фејсбук“. До кога ќе биде супер, не се знае.

Исто така и „Јутјуб“ веќе има сериозна критична маса околу себе и е веќе легитимен дел од пазарот на којшто може да се биде активен.

ATD: Дали сите овие измени се своевидна чистка поради појавата на лажните вести?

- Нема тајна. Мотивацијата за тие промени се лажните вести, особено т.н. клик-бајт лажни и заведувачки наслови. Ова е дел од борбата против нив. И „Фејсбук“ и „Гугл“ се под голем притисок од јавноста и од институциите да преземат нешто против таквите содржини. Ова е еден од чекорите за справување со лажните вести.

ВИДЕО: Интервју со Дарко Булдиоски, специјалист за дигитален маркетинг

(Текст, фото и видео: Тоше Огњанов/AdToDate.mk)




Слична содржина

Оставете коментар

CAPTCHA code
Слична содржина
Напишавме