Admen

ЛЕЊА ФАРАГУНА, „marCAREting“: Жените не се вонземјани што носат омекнувачи за алишта во чантите

12 апр 2018

Создавајте реклами што создаваат однос човек со човек (Human2Human), што се за битни работи и што не ги третираат жените како вонземјани што во своите чанти носат омекнувачи за алишта, вели Лења Фарагуна, основач на The Modern MarCAREting Academy.

Фарагуна е од Словенија, но е чест гостин на фестивали и собири низ светот поврзани со модерниот маркетинг. Тоа што таа го промовира во своите говори е да се смени односот во целата огласувачка индустрија од „Business To Business“ (B2B), во „Human To Human“ (H2H).

„Верувам дека маркетингот (marcareting) може да функционира само кога покажувате грижа. Грижа кон себе си. Грижа кон другите. Верувам дека освен вие самите, нема никој друг што најсовршено може да го изгради или редизајнира вашиот сопствен бренд“, вели Фарагуна.

Фарагуна е основач и на Словенечкото биро за радиско рекламирање, а држи и работилници за ефикасно огласување преку радио.

АТД: Почитувана Лења, разговорот со вас би го почнале преку една фотографија што ја споделивте преку „Фејсбук“. Фотографијата е од бурекчилница, на чиј излог стојат прикази од различните типови бурек што таму се нудат, но напишани и на англиски јазик. Така бурекот од зеље (Burek od zelja), на англиски е преведен како „Burek with desire “ (Бурек со желбa).

Бурекчијата преку сопствената досетливост, или поради непознавање на англискиот јазик, направил примамлива реклама со којашто ги привлекува странските потрошувачи.

Кон зборот креативност имам однос во кој се мешаат љубов и омраза. Се употребува погрешно, не е доволно разбран, и служи како неков подарок од раѓање наменет за одредена елита луѓе

Согласно „Бурекот од желби“, може да се заклучи дека креативноста е насекаде и, свесно или несвесно, постојано се користи. Сепак, што вам ви значи зборот „креативност“, дали е доволно бурекот од зеље (случајно) да стане бурек од желби?

- Кон зборот креативност имам однос во кој се мешаат љубов и омраза. Се употребува погрешно, не е доволно разбран, и служи како неков подарок од раѓање наменет за одредена елита луѓе.

Креативноста првенствено мора да служи за повисоки цели, како што истакна Сер Кен Робинсон: „Оригинални идеи што имаат вредност“. Второ, „Креативноста може секој да ја научи, сите ние сме фасцинантно уникатни-оригинални суштества способни за епска оригиналност, таа е вродена во нас“. Амин.

АТД: „MarCAREting“, пак, е термин во ваша креација. Повторно креативна игра со зборови, а во која јасно се гледа дека е неопходно некој за се грижи за нешто или за некого. Кој за кого или за што треба да се грижи кога станува збор за маркетингот?

Мојот концепт на MARCARETING постои и се шири доста брзо, не само затоа што тој ми ги спаси животот и бизнисот, туку е спас и за голем број претприемачи во светот, кои работеле до раб да целосно истоштување и исцрпување речиси до смрт, без да бидат платени за тоа

- Мојот концепт на MARCARETING постои и се шири доста брзо, не само затоа што тој ми ги спаси животот и бизнисот, туку е спас и за голем број претприемачи во светот, кои работеле до раб да целосно истоштување и исцрпување речиси до смрт, без да бидат платени за тоа, а кои денес веќе бираат различен начин на живот.

Но, ќе бидам малку безобразна, и веќе претпоставувам дека ти, читателу што ги читаш овие зборови токму сега, помислуваш дека зборот „CARE“ во „marCAREting“ значи дека ние навистина треба да се грижиме (to truly CARE) за нашите клиенти?! Но, не. Не е така.

Сите ние треба да научиме прво да се грижиме (to CARE) за самите себе!

Грижа (CARE) за самиот себе? Љубов кон себе си? Дали тоа е јадрото на модерниот маркетинг?

„Лења, што пиеш? Дали велиш дека масажа и 'мартини' со пријателите е клучот до ефикасен модерен маркетинг?“ Одговорот е: Да. И не.

Не само масажа и мартини, туку отворено сакање на себе си. Тоа значи да се живеат сопствените вредности, да се каже „не“, кога мислиме на „не“, одредување јасна слика за себе пред клиентите, партнерите, шефовите.. итн.

Тоа значи, да, велам дека најефикасниот маркетинг е кога вие се грижите (CARE) за самите себе и за другите.

АТД: Може ли вашата „теорија“ за „marCAREting“ да се употреби и кај големите брендови? Колку тие навистина можат да покажат таква „љубовна“ грижа кон своите потрошувачи, или, сепак, таа (CARE) привилегија полесно си ја допуштаат помалите огласувачи, кои полесно доаѓаат во контакт со луѓето?

- Верувам дека не може да стане збор за тоа дали брендовите, големи или мали, водат грижа за нивните корисници, туку за тоа дека луѓето „водат грижа“ за луѓе. И за тие големи брендови работат луѓе. Така и во тој случај станува збор за комуникација и грижа „Human2Human“. Доколку вработените во големите корпорации водат грижа за самите себе, тогаш и тие ќе бидат способни да водат грижа за своите потрошувачи.

Кога креираат огласувачки кампањи за нивните клиенти, агенциите треба да го следат легендарниот совет од Давид Огилви (David Ogilvy): „Потрошувачот не е морон, тој е твојата сопруга“

АТД: Што е тоа што маркетинг агенциите би требало да го направат, или променат во сопственото работење, а со цел да манифестираат поголема грижа додека се на позицијата на медијатор меѓу брендовите и потрошувачите.

- Да се потсетат самите себе и нивните клиенти дека на секоја од вклучените страни работат луѓе (Како од страната на агенцијата, така и од страна на потрошувачите) со мозок, срце и сопствени стремежи и верувања.

Така, кога креираат огласувачки кампањи за нивните клиенти, агенциите треба да го следат легендарниот совет од Давид Огилви (David Ogilvy): „Потрошувачот не е морон, тој е твојата сопруга“.

Тоа значи следново:

- Не правете реклами за да се тркате за награди, туку за да промените животи

- Не работете со клиенти, чиишто вредности не се во согласност со нив самите

- Не правете реклами во кои се изнесуваат лажни тврдења

- Користете реални луѓе, коишто не се перфектни

- Создавајте реклами што комуницираат човек со човек (human2human) за работи што се битни и коишто не ги третираат жените како вонземјани што носат омекнувачи за алишта во нивните чанти.

АТД: Во бизнис светот се користи терминот B2B (Business To Business). Сепак, вие го сменивте тоа со H2H (Human to Human, Hearth To hearth). Можна ли е примена на таквиот (H2H) став во бизнисот, со оглед дека таму профитот е на прво место?

- Да, можно е. Тоа е одлука што една компанија ќе ја донесе и ќе живее со неа. Секако, во исто време тоа е одлука и на секој поединец што работи за голема компанија или агенција.

„Zappos“, компанија со повеќе од 5.000 вработени веќе го прави тоа, што значи дека е возможно. Тие нека послужат како инспирација. Но, зошто се „Запос“ посебни? Одговорот лежи во нивниот последен проект: http://www.zappos.com/roadshow

Нивното наследство е многу поголемо, а не само обувки, облека, накит. За нивното наследство може да се прочита во личното писмо од нивниот генерален директор Tony Hsieh (deliveringhappiness.com).

Вредностите што ги промовираат, се нивни лични животни ставови и со едноставен јазик се пренесени до јавноста во делот каде се опишуваат себе си: „About us“ (http://www.zappos.com/core-values). Освен тоа, своите директори ги нарекуваат мајмуни (Monkeys), за што е потребна голема храброст (http://www.zappos.com/c/about-zappos- monkeys).

Тие одговараат на секој коментар на „Фејсбук“, исто како што пријателите тоа го прават едни со други. Тие прво се тетовираат себе си во срцата и умовите на луѓето (а дури потоа во нивните паричници). (https://www.slideshare.net/InfinitOInc/10-inspiring-zappos-customer-support-stories).

АТД: Во едно од вашите предавања рековте дека радио-рекламите се визуелен израз повеќе од телевизијата. Сепак, се чини дека такви, „визуелни“ радиски реклами денес речиси и нема, а тоа што постои е грдо за слушање. Зошто престана развојот на радиските реклами?

- Точно е и поради тоа ми се крши срцето. Но, зошто е таква ситуацијата? Имате ли три дена за да дојдеме до ДНК структурата на овој проблем, заедно со неколку шишиња црвено вино? (само се шегувам).

Едноставно е: Радиото веќе не е популарно другарче.

Зошто? Затоа што радиостаниците не се избрендираа доволно и не се доволно гласни и јасни за неверојатните особености што радиото како огласувачки медиум ги има во себе и како тоа може да се користи во комбинација со други медиуми и да донесе неверојатни резултати.

Најголемиот дел од рекламите на радио се само аудио верзија од телевизиските реклами, гласовна читачка верзија од печатените реклами, или, пак, листа за купување намирници што се чита многу гласно, со многу звуковни ефекти

Втора причина е тоа што никој не ги научи агенциите како да пишуваат и да снимаат радио реклами и да креираат ефикасни медиа-планови. (Несоодветното медиумско планирање е една голема причина за падот на рекламите).

Најголемиот дел од рекламите на радио се само аудио верзија од телевизиските реклами, гласовна читачка верзија од печатените реклами, или, пак, листа за купување намирници што се чита многу гласно, со многу звуковни ефекти.

Радио-рекламирањето е убав „медиум“ кој е единствен и уникатен (кога е направен како што треба), каде што слушателите се дополнителни креатори на рекламните содржини.

Секој и сите слушатели. Тоа значи дека „бариерите“ што ја спречуваат довербата ги нема и рекламните пораки, како Купидонова стрела, се забодуваат директно во умот, срцето и дури потоа во паричниците на слушателите. Тоа ќе биде можно само ако огласувачите и агенциите веруваат повеќе во љубов. Љубов кон самите себе и кон другите.

АТД: Би му препорачале ли на некој огласувач да издвои поголем финансиски влог за радиска, наместо за телевизиска реклама? Зошто?

- Едно од ветувањата што си ги дадов на себе си е никогаш да не давам општ, генерички, совет за луѓе што не ме прашале самите и не ме побарале лично. Така, ако кој било од вашите читатели има специфично прашање, ќе му одговорам конкретно. Слободно нека ме прашаат на lenja@lenjafaraguna.com, јас лично ги читам мејловите и одговарам.

АТД: Често сте на патувања низ Европа и држите интересни предавања. Би дошле ли и во Македонија да одржите едно предавање?

- Мојот куфер може да биде готов за 41 минута. Никогаш претходно не сум била во Македонија, а тоа е доволна причина за да ја ставам земјата на приоритетната листа дестинации за следно предавање. Мои пријатели од младоста беа Васил, Виолета, Фани, Костадин, коишто се имаа доселено од Скопје во Марибор. Судејќи според нив, јас веќе ги обожавам луѓето од Македонија и самата земја.

(Тоше Огњанов/AdToDate.mk)




Слична содржина

Оставете коментар

CAPTCHA code
Слична содржина
Напишавме