Admen

ДИМИТАР ЈОВЕВСКИ, ЕКОНОМСКИ ФАКУЛТЕТ: Денешниот студент по маркетинг доаѓа со големо предзнаење

04 фев 2019

Дигиталното огласување е динамична категорија и во него не важи навиката „плати и чекај резултати“. Треба на дневна основа да се следат кампањите, укажува доцент д-р Димитар Јовевски од Економскиот факултет при Универзитетот „Св.Кирил и Методиј“ во Скопје.

Во интервју за „AdToDate.mk“, Јовевски зборува за интересот на денешните студенти кон дигиталниот маркетинг, како и за состојбите со дигиталното огласување во Македонија.

ATD: Предавате на Економскиот факултет при УКИМ, на одделот за Е-бизнис каде дел од наставната програма е и дигиталниот маркетинг. Колкав е интересот кај студентите за овој вид маркетинг?

- Да предавам на департманот Е-бизнис повеќе од 10 години и активно работам со студените исто толкав период. Оваа програма од секогаш била атрактивна за студентите, како заради проблематиката која се опфаќа, така и заради актуелноста на областите што се изучуваат.

Предавам дигитален маркетинг и овој предмет претставува основа за сите идни дигитални маркетери. Имајќи ги во предвид глобалните трендови, од кои во ниту еден момент моите студенти не се исклучени, интересот за овој вид маркетинг од година во година е сè поголем, а со тоа и предизвикот да се унапредува оваа област од моја страна расте од година во година.

Многу е поразлично од пред 15 години. Денешните студенти доаѓаат со многу повеќе предзнаење, многу повеќе информации или претпоставки за проблематиката

ATD: Како денешниот студент гледа на дигиталниот маркетинг, за разлика од студентите пред 10-15 години? Како, воедно, ја гледаат и својата перспектива во тоа поле?

- Многу е поразлично од пред 15 години. Денешните студенти доаѓаат со многу повеќе предзнаење, многу повеќе информации или претпоставки за проблематиката.

Како млади луѓе секојдневно се бомбардирани со информации поврзани со оваа проблематика, а некои од нив започнуваат да навлегуваат во оваа проблематика уште пред започнување на факултетот преку неформално образование. Со други зборови предизвикот е многу поголем денес отколку некогаш.

ATD: Кога станува збор за огласувањето денес, многу често се користат и термините „индустрија на креативни комуникации“, „маркетинг индустрија“, „огласувачка индустрија“. Колку терминот „индустрија“ е автентичен и за македонската огласувачка сцена?

- Ако тргнеме од дефиницијата на зборот „индустрија“ секако дека може да се смета за автентичен. Во последните години на македонскиот пазар се појавија многу нови мали компании кои се занимаваат со оваа проблематика и гледаат релевантност во тоа што го работат, а секако и простор за заработка во оваа индустрија.

Во 2018 година имаме голем пораст на маркетинг буџетите за рекламирање преку дигитални канали во Македонија. Тој тренд ќе продолжи и во 2019 година

Од друга страна бројките се на страна на оваа „индустрија“ и во 2018 година имаме голем пораст на маркетинг буџетите за рекламирање преку дигитални канали во Македонија. Тој тренд ќе продолжи и во 2019 година.

ATD: Дигиталниот маркетинг станува комплексна категорија. Сепак, кои се најбитните елементи во дигиталното огласување што треба да се запазат, за една кампања да биде успешна?

- Како што споменавте во прашањето, станува збор за комплексна категорија која е комбинација од повеќе елементи.

Според мене клучни се три работи.

Најнапред да имате соодветна/оргинална идеа, која мора да биде во тесна корелација со тарегетираната публика која морате да ја познавате детално. Од тука произлегува изборот на комуникација, дигиталните канали кои би се користеле. Развојот на самата идејата доаѓа со детално поучување на идеалниот потрошувач.

Дигиталното огласување е динамична категорија, за која не важат старите навики на плати и чекај резултати, напротив овде треба постојано, на дневна основа треба да се следат резултатите од кампањите

Втор елемент е да бидете подготвени на оптимизирање на буџетите на дневна основа. Дигиталното огласување е динамична категорија, за која не важат старите навики на плати и чекај резултати, напротив овде треба постојано, на дневна основа треба да се следат резултатите од кампањите.

И, последниот елемент е да примените метод на интеграција на дигиталните канали во процесот на огласување, односно доколку забележувате дека не одат работите како што треба, да не се плашите да направите нов обид на нов канал, со нова идеја или адаптирана идеја, сè додека не го најдете најсоодветниот канал/содржина за вашата идеална публика.

ATD: Што се случува со блискиот однос кон потрошувачот? Дали со дигиталното огласување се занемари тој сегмент? Како да се одржи врската огласувач – потрошувач?

- Дигиталното огласување го нагласува и го негува блискиот однос со потрошувачите. Денеска не постои потаргетирано и поперсонализирано огласување од огласувањето преку дигиталните канали. На корисниците им се пласира персонализирана содржина според нивната историја на однесување и преференци.

На корисниците им се дава можност да влезат во интеракција „еден на еден“ со брендовите, нешто што било незамисливо пред само 10 години

Денеска исто така на корисниците им се дава можност да влезат во интеракција „еден на еден“ со брендовите, нешто што било незамисливо пред само 10 години.

ATD: Какви се вашите очекувања, во која насока ќе се движи дигиталното огласување во 2019 година? Колку тоа ќе се одрази и на нашата маркетинг сцена?

- Веќе на оваа тема се разговара во маркетинг круговите и она што можам да го забележам и истакнам се неколку работи:

* Едно е сигурно во светот па и во Македонија на социјалните мрежи ќе се прават обиди за враќање на довербата кај корисниците. Аферата Cambridge Analytica ја сруши вербата кај секојдневниот корисник и покрена низа на прашања за (зло)употребата на личните податоци. GDPR во 2018-та помогна во поставувањето транспарентни политики и ја охрабри транспарентната комуникација помеѓу корисниците и брендовите. Токму за брендовите главна мисија стана градењето доверба кај својата публика, процес кој ќе продолжи и во 2019-та.

* За очекување е во 2019 година да гледаме сè повеќе т.н. Storytelling на социјалните мрежи со/или без помош на инфлуенсери и микроинфлуенсери. Секој бренд кој е присутен сака, на свој начин, да раскаже некоја или повеќе свои приказни. Овој тренд нема да ја заобиколи ниту Македонија.

За очекување е во 2019 година брендовите да се фокусираат на квалитетна содржина, а особено содржина генерирана од корисници. Помалку, но добро осмислена содржина има подобар резултат отколку да се објавуваат голем број различни содржини

* Фактот што пет милијарди корисници на месечно ниво кои користат некоја (или неколку) апликации за текстуална (и визуелна) комуникација дава можност за развој и примена на „Chat bots“ во секојдневната комуникација со корисниците на различните дигитални платформи.

* Квалитет, квалитет и квалитет. За очекување е во 2019 година брендовите да се фокусираат на квалитетна содржина, а особено содржина генерирана од корисници. Помалку, но добро осмислена содржина има подобар резултат отколку да се објавуваат голем број различни содржини кои во својата основа не се креативни и од публиката перцепирани како „плитки“ и неинтересни.

* Нешто што е возможно да се случи до крајот на 2019 година во светот е Инстаграм да го преземе приматот во однос на Фејсбук како социјална мрежа.

(AdToDate.mk)




Слична содржина

Оставете коментар

CAPTCHA code
Слична содржина
Напишавме