Campaigns

КОЈ Е ВИНОВЕН ЗА ЛОШАТА КАМПАЊА: Клиентот или агенцијата?

28 сеп 2017

Изгубени во преводот, е ситуација во која барем еднаш се нашле сите кои биле во комуникациска релација агенција - клиент. Како да добиете добар брифинг, кои се проблемите со кои секојдневно се соочуваат агенциите и клиентите и каде настанува разидување во комуникацијата, беа дел од темите на кои се разговараше на панелот „Изгубени во преводот“ во рамките на фестивалот „Викенд медиа“ што се одржа во Ровињ, Хрватска.

Според дел од панелистите на дебатата, во градењето релација со клиентот битно е да се разбере што тој сака да каже кога бара одредена услуга. Тоа најдобро се постигнува ако агенцијата и клиентот се познаваат подолг период, односно имаат подолга меѓусебна соработка.

- Ако односот меѓу вклучените страни е добар и ако се базира на доверба и долгогодишна заедничка работа, агенцијата многу поедноставно ќе сфати која е проблематиката со која се занимава клиентот и какви решенија му се потребни - рече Сања Милиновиќ, директорка на секторот за директен пристап на пазарот во „Хрватски телеком“.

Милиновиќ во текот на својата кариера била и на страната на клиентите и на страната на агенцијата. Таа додаде дека комуникацијата може да биде многу подобра ако клиентот знае што сака. Но, тоа не е секогаш случај.

Според Дамир Циглар, двете страни во процесот на комуникацијата пристапуваат со одредени предрасуди.

- И едната и другата страна има многу предрасуди, но тоа е нешто за коешто мораме да најдеме примирје - рече Циглар, директор на агенцијата „Имаго Огилви“ од Хрватска.

Според Циглар, тешко е да се процени чија е одговорноста кога кампањата не ги покажува посакуваните резултати.

- Во ситуации кога еден проект или стратегија се изработува на база на брифирањето, тој што е одговорен за процесот првенствено мора да увиди дали идејата која е понудена ги задоволува потребите и барањата искажани на брифингот, без оглед дали таа му се допаѓа или не на клиентот - смета Циглар.

Подготвеноста да се преземе ризик исто така е еден од клучните фактори кои можат да доведат или до одлични резултати или, пак, да завршат како целосно фијаско. Поради односот 50-50, повеќето од клиентите ретко се впуштаат во непредвидливи кампањи кои не можат да се контролираат.

- Кога ризикуваме, честопати резултатите се многу добри. Но, знаеме дека малкумина се подготвени на такво нешто. Некогаш ниту ние не сме подготвени на таков чекор, со оглед на природата на индустријата од која доаѓаме. Но, многу ризични кампањи се покажале како успешни - истакна Хелена Трајковски, директорка на маркетинг за Хрватска и Словенија, во Мастеркард.

Менталитетот на „играње на сигурно“ владее претежно и на нашиот маркетиншки пазар. Клиентите ретко се одлучуваат да почнат „танц“ со агенција со која претходно не соработувале, особено поради стравот дека тоа што ќе го добијат како продукт не би ги задоволило нивните барања.

Но, во истата таа релација држи и ставот дека честопати, клиентите не знаат како да го кажат тоа што го замислуваат. Тука е битна улогата на агенцијата, да ја разбере природата на дејноста со која се занимава клиентот, како и да ја увиди корпоративната атмосфера и мнение кое постои во рамките на неговата компанија, фирма или дејност.

(Adtodate.mk/Marketingmreza.rs)





Оставете коментар

CAPTCHA code
Слична содржина
Напишавме