Local

НЕДЕЛА НА ДИЗАЈНОТ ВО СКОПЈЕ: Земја во фокусот е Германија, темата е „Објективност“

20 ное 2018

Под тематската одредба „Објективност“ од денеска, 21 ноември, до недела во културниот центар Јавна соба, ќе се одржи осмото издание на мултимедијалниот настан Недела на дизајнот.

Земја во фокусот годинава е Германија, како велесила во областа на дизајнот. Целиот настан, пак, ќе биде поделен на шест целини со кои ќе се афирмираат културните и креативни индустрии во регионот.

Темата „Објективност“ е обид да се разбие заблудата дека еден производ треба да има само атрактивна форма за да може да се изложи и продаде.

„Кога се купува еден производ, се чини дека се бира врз основа на неговата естетика, а се занемарува важноста на функционалноста, материјалите и економските чинители. Оваа година, го избравме објективното над субјективното – создадовме платформа за да демонстрираме дека при бирање на еден производ одлуките треба да се засновани пред сѐ на логичка синтеза и дека токму тоа е суштината на дизајнот - функцијата“, велат организаторите.

Германија, годинешната земја во фокус, ќе се претстави со 12 светски познати дизајн студија, отворени презентации на дизајнерите, посета и соработка со производители од Македонија кои сакаат да настапат на германскиот пазар.

„Германија е моторот на Европа во поглед на индустриски развој, производство, извоз и земја број 1 во светот во организирање меѓународни саеми и поврзување на бизниси од целиот свет. Добриот и квалитетен дизајниран мебел може да има успех само ако производителот успее да го пласира на светските пазари, а она што е најтешко за најголемиот дел од македонските производители е долгорочниот пласман на светските пазари“, велат организаторите.

Во рамките на меѓународната изложба ЕКСПО ќе се претстават домашни производители, како и млади перспективни дизајнери од целиот регион кои се во потрага по производители. Ќе има и студентски изложби од две академии за дизајн.

За првпат годинава e организирана посета на фабрики за мебел со цел да се поттикне соработка со дизајнерите од други земји и компаниите.

Традиционално за Неделата на дизајнот ќе има и настапи на музички уметници од регионот, а ќе се организира и гастрономско шоу.

Повеќе детали за програмата на Неделата на дизајнот се достапни на официјалната интернет страница:  www.ministryofpleasure.net.

(AdToDate.mk)




Слична содржина

Оставете коментар

CAPTCHA code
Слична содржина
Напишавме